ភ្នំពេញ÷ រដ្ឋមន្ត្រីការបរទេសធុរកិច្ចអន្តរជាតិពាណិជ្ជកម្មនិងថាមពល នៃប្រទេសដូមីនីក ចង់ពង្រឹង និងពង្រីកកិច្ចសហប្រតិបត្តិការលើវិស័យកសិកម្មរវាងកម្ពុជា-ដូមីនីក។

រដ្ឋមន្ត្រីការបរទេស ធុរកិច្ចអន្តរជាតិ ពាណិជ្ជកម្ម និងថាមពល នៃប្រទេសដូមីនីកលោក វីន ហេនដឺសាន់ (Vince Henderson) បានដឹកនាំគណៈប្រតិភូចូលជួបសម្តែងការគួរសមដល់សម្តេចតេជោ ហ៊ុន សែន នាយករដ្ឋមន្ត្រីកម្ពុជា និង ពិភាក្សាលើការងារមួយចំនួន នៅព្រឹកថ្ងៃសុក្រ ទី២៤ ខែមីនា ឆ្នាំ២០២៣។

ក្នុងជំនួបនេះ លោក វីន ហេនដឺសា បានបញ្ជាក់ថាទស្សនកិច្ចរបស់លោកពេលនេះ គឺដើម្បីពង្រឹងទំនាក់ទំនងប្រទេសទាំងពីរ ឱ្យកាន់តែស៊ីជម្រៅថែមទៀត តាមរយៈក្រមខណ្ឌទ្វេភាគី និងពហុភាគី ជាពិសេសតាមរយៈការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរលើវិស័យកសិកម្ម និងនេសាទ។

រដ្ឋមន្ត្រីការបរទេសរូបនេះ ក៏បានសម្តែងនូវការគោរពចំពោះ សម្តេចតេជោ ហ៊ុន សែន ដែលបានដឹកនាំប្រទេសកម្ពុជា ប្រកបដោយសុខសន្តិភាព ស្ថិរភាព និងការអភិវឌ្ឍ។

ទន្ទឹមនោះ សម្តេចតេជោ ហ៊ុន សែន បានស្វាគមន៍ចំពោះការចុះហត្ថលេខាលើកិច្ចព្រមព្រៀងលើទិដ្ឋាការ ដែលនេះជាការចាប់ផ្តើមដ៏ល្អសម្រាប់កិច្ចសហប្រតិបត្តិការរវាងប្រទេសពីរ និង បានស្វាគមន៍ផងដែរចំពោះបំណងរបស់ លោក វីន ហេនដឺសាន់ ដែលចង់ពង្រឹង និងពង្រីកកិច្ចសហប្រតិបត្តិការលើវិស័យកសិកម្មរវាងប្រទេសទាំងពីរ។

ជាមួយគ្នានេះដែរ សម្តេចក៏បានស្នើដល់រដ្ឋមន្ត្រីការបរទេសធុរកិច្ចអន្តរជាតិពាណិជ្ជកម្មនិងថាមពល នៃប្រទេសដូមីនីក ឱ្យពិនិត្យលទ្ធភាព ក្នុងការពង្រីងកិច្ចសហប្រតិបត្តិការទៅលើវិស័យផ្សេងៗទៀត ដូចជាវិស័យទេសចរណ៍ជាដើម៕